Швейтсарияда режалаштирилган АҚШ–Эрон музокаралари бекор қилинди
Учрашув ўтказилмаслиги Швейтсария ТИВ томонидан тасдиқланган.
Reuters агентлигининг Швейтсария Ташқи ишлар вазирлигига таяниб хабар беришича, 19 июнь куни Швейтсариянинг Бургенсток курортида бўлиб ўтиши режалаштирилган АҚШ ва Эрон ўртасидаги музокаралар бекор қилинган.
Расмий маълумотга кўра, учрашув ўтказилмаслиги Швейтсария ТИВ томонидан тасдиқланган.
Шу билан бирга, АҚШ томони вице-президент J.D. Венснинг Швейтсарияга сафари бекор қилинганини маълум қилган. Бироқ Вашингтон дипломатик мулоқот тўлиқ тўхтаб қолмаганини таъкидлаб, Эрон билан техник музокаралар имкон қадар тезроқ бошланишига умид билдирмоқда.
Аввалроқ АҚШ ва Эрон ўртасида вақтинчалик ўзаро англашув меморандуми имзолангани ҳақида хабар берилган эди. Унга кўра, 60 кунлик ҳарбий ҳаракатларни тўхтатиш, Ҳормуз бўғози орқали юк ташишни тиклаш, Вашингтоннинг Эрон портларига қарши денгиз блокадасини бекор қилиш ҳамда музокараларнинг янги босқичини бошлаш каби бандлар назарда тутилган.
Эрон Ташқи ишлар вазирлиги вакиллари эса алоҳида имзолаш маросими ўтказиш зарур эмаслигини билдирган.
