Трамп Эрон билан меморандумни Теҳроннинг таслим бўлиши деб атади
АҚШ Конгрессдаги айрим сиёсатчилар эса меморандумни Эрон эмас, АҚШнинг таслим бўлишига ўхшатди.
АҚШ президенти Доналд Трамп Эрон билан имзоланган ўзаро англашув меморандумини Теҳроннинг амалда таслим бўлиши сифатида баҳолади. У бу ҳақда Ахios нашрига берган интервьюсида маълум қилган.
Трампнинг таъкидлашича, Қўшма Штатлар Эронни ҳарбий жиҳатдан тўлиқ мағлуб этган ва эришилган келишувни “деярли шартсиз таслим бўлиш” сифатида кўрмоқда.
“Бу, эҳтимол, шартсиз таслим бўлишдир. Мен шундай деб ҳисоблайман. Биз уларни ҳарбий жиҳатдан тўлиқ мағлуб этдик”, — деган АҚШ президенти.
Шунингдек, Трамп АҚШ дунёдаги энг қудратли ҳарбий кучга эгалигини таъкидлаб, Эрон портларига қарши жорий этилган денгиз блокадаси мисолида Вашингтоннинг имкониятларини намойиш қилганини қайд этган.
“Бизда дунёдаги энг кучли ҳарбий салоҳият мавжуд. Мен Эрон учун денгиз блокадасини жорий қилдим ва бирорта ҳам кема ўта олмади”, — деган у.
АҚШ раҳбари можародан қандай сабоқ чиқаргани ҳақидаги саволга жавобан “куч ишлатиш имкониятларининг чегараси йўқ”, дея жавоб берган.
Аввалроқ Эрон олий раҳбари Можтабо Хоманаий АҚШ билан ўзаро англашув меморандумини имзолашга рухсат бергани ҳақида хабарлар тарқалган эди. Унинг фикрича, АҚШ президенти Доналд Трамп турли босим воситалари орқали келишувга эришишга уринган.
Шу билан бирга, АҚШ Конгрессидаги айрим демократ ва республикачи қонунчилар Трамп маъмуриятини Эрон билан тузилган келишув юзасидан танқид қилган. Жумладан, сенатор Ричард Блументал ушбу меморандумни “АҚШ учун уятли келишув” деб атаб, ҳужжат кўпроқ Вашингтоннинг эмас, балки АҚШнинг ўзи таслим бўлгандек таассурот уйғотаётганини таъкидлаган.
