ЖЧ-2026: Канада Қатарни 6:0 ҳисобида мағлуб этди
Қатар икки футболчисининг четлатилиши ортидан 9 киши билан ўйинни якунлаган.
2026 йилги футбол бўйича Жаҳон чемпионатининг гуруҳ босқичи иккинчи турида Канада терма жамоаси Қатар устидан ишончли ғалабага эришди. Ванкувер шаҳридаги BC Place стадионида бўлиб ўтган учрашув мезбонларнинг 6:0 ҳисобидаги ғалабаси билан якунланган.
Канадаликлар сафида Кайл Ларин 16-дақиқада ҳисобни очган бўлса, Жонатан Девид 29-, 45+3- ва 90+2-дақиқаларда рақиб дарвозасини ишғол қилиб, хет-трик қайд этган. Яна бир голни 64-дақиқада Натан-Дилан Салиба урган. 75-дақиқада эса қатарлик Муҳаммад Ал-Маннаи ўз дарвозасини ишғол қилиб, ҳисобни янада йириклаштирган.
Учрашув давомида Қатар терма жамоаси икки футболчисидан айрилган. Дастлаб 33-дақиқада Ҳомам Ал-Амин қўпол ҳаракати учун тўғридан-тўғри қизил карточка олиб майдонни тарк этган. Иккинчи бўлимда эса Ассим Мадибо Исмоил Коненинг оғир жароҳатланишига сабаб бўлган вазиятдан сўнг майдондан четлатилган. Шундан сўнг Қатар учрашувни тўққиз футболчи билан якунлашга мажбур бўлган.
Б гуруҳининг бошқа учрашувида Швейтсария Босния ва Гертсеговинани 4:1 ҳисобида мағлуб этган. Натижада Канада олти очко билан гуруҳ пешқадамига айланган.
Гуруҳ босқичининг учинчи турида Канада терма жамоаси Швейтсария билан, Қатар эса Босния ва Гертсеговина билан баҳс олиб боради.
2026 йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтмоқда. Амалдаги жаҳон чемпиони Аргентина ҳисобланади.
