Эртага, 21 июнь йилнинг энг узун куни бўлади

 

Associated Press агентлигининг хабар беришича, 21 июнь куни Шимолий ярим шар аҳолиси йилнинг энг узун кунини бошдан кечиради. Мазкур астрономик ҳодиса ёзги қуёш туриши деб аталади ва Қуёшнинг осмондаги энг юқори нуқтага кўтарилиши билан тавсифланади.

 

Ушбу даврда кундузги ёруғлик давомийлиги максимал даражага етади ва Қуёш уфқ узра энг узоқ вақт давомида кўриниб туради. Шундан сўнг Шимолий ярим шарда кундузлар аста-секин қисқара бошлайди ва бу жараён декабрь ойидаги қишки қуёш туришигача давом этади.

 

Жанубий ярим шарда эса бунинг акси кузатилади. У ерда йилнинг энг қисқа куни қайд этилиб, астрономик қиш фасли бошланади.

 

Мутахассисларнинг таъкидлашича, “қуёш туриши” атамаси лотинча sol — «қуёш» ва stitium — «тўхташ» сўзларидан келиб чиққан бўлиб, Қуёшнинг осмондаги кўринма ҳаракати маълум нуқтада гўёки тўхтагандек кўринишини англатади.

 

Астрономларнинг изоҳига кўра, Ер ўқининг қиялиги сабабли Қуёш нури йил давомида Шимолий ва Жанубий ярим шарлар ўртасида турлича тақсимланади. Айнан шу омил фаслларнинг алмашинуви ҳамда кундуз ва тун давомийлигидаги фарқларни юзага келтиради.

 

Ёзги қуёш туриши одатда 20–22 июнь оралиғида содир бўлади. Бу йил ушбу ҳодиса 21 июнь санасига тўғри келмоқда. Қишки қуёш туриши эса одатда 20–23 декабрь кунлари орасида кузатилиб, Шимолий ярим шарда йилнинг энг қисқа куни ва энг узун тунини бошлаб беради.