Нью-Йоркдаги 174 йиллик тарихий черков бутунлай ёниб кетди
Бруклиндаги тарихий черков икки соат ичида кулга айланди.
АҚШнинг Нью-Йорк шаҳри Бруклин туманидаги Жанубий Бушвик ислоҳот черковида юз берган йирик ёнғин оқибатида 174 йиллик тарихий бино деярли бутунлай вайрон бўлди.
АBС телеканали маълумотларига кўра, ёнғин маҳаллий вақт билан соат 13:20 атрофида Бушвик авенюсидаги черков биносида бошланган. Орадан тахминан 20 дақиқа ўтиб, бинонинг қўнғироқ минораси қулаб тушган.
Нью-Йорк ёнғин хавфсизлиги хизмати бир неча соат давомида ёнғинни ўчириш ишларини олиб борган ва соат 15:35 га келиб аланга деярли тўлиқ бартараф этилган. Ҳодиса вақтида бир нафар ўт ўчирувчи енгил жароҳат олиб, унга воқеа жойида тиббий ёрдам кўрсатилган.
Мутахассисларнинг дастлабки баҳоларига кўра, ёнғин черков биносига жиддий зарар етказган ва иншоотни бузиб ташлаш масаласи кўриб чиқилмоқда. Ёнғиннинг келиб чиқиш сабаблари ҳозирча номаълум бўлиб, ҳодиса юзасидан тергов ҳаракатлари давом этмоқда.
Таъкидланишича, Жанубий Бушвик ислоҳот черкови 1982 йилда АҚШнинг Тарихий жойлар миллий реестрига киритилган. Маҳаллий аҳоли ва тарихшунослар ушбу ёдгорликнинг йўқолишини ҳудуднинг маданий ва тарихий мероси учун катта йўқотиш сифатида баҳоламоқда.
