Ўзбекистонда эски автомобилларни утилизацияга топширмаганлар жарима тўлайди
Ишлаб чиқарилганига 30 йил ва ундан ортиқ вақт бўлган автомобиллар эгаларидан бозор нархида харид қилиниб, утилизацияга юборилади.
Ўзбекистонда эксплуатация муддати ўтган автотранспорт воситаларини утилизация қилиш тизимини босқичма-босқич жорий этиш режалаштирилмоқда. Бу ҳақда Чиқиндиларни бошқариш агентлиги хабар қилди.
Маълум қилинишича, ишлаб чиқарилганига 30 йил ва ундан ортиқ вақт бўлган автомобиллар эгаларидан бозор нархида харид қилиниб, утилизацияга юборилади.
Ташаббус атмосфера ҳавосининг ифлосланишини камайтириш, экологик барқарорликни таъминлаш ва транспорт воситаларидан чиқаётган зарарли моддалар ҳажмини қисқартириш мақсадида ишлаб чиқилган.
Лойиҳага кўра, эски автомобилини утилизацияга топширган фуқароларга янги автомобиль хариди учун электрон ваучер берилиши ёки унинг қиймати пул шаклида тўлаб берилиши мумкин. Электрон ваучер орқали Ўзбекистонда ишлаб чиқарилган янги автомобилларни имтиёзли шартларда харид қилиш имконияти яратилади.
Шунингдек, электрон ваучерда кўрсатилган сумма миқдорида чегирма қўлланади, қолган маблағ эса бир йилдан ортиқ муддатга бўлиб-бўлиб тўланиши мумкин.
Лойиҳада эски автомобилларни ўз вақтида утилизацияга топширмаган фуқаролар учун ҳам экологик компенсация жорий этиш назарда тутилган. Унга кўра, бундай транспорт воситалари эгалари йилига бир марта базавий ҳисоблаш миқдорининг 30 баравари миқдорида тўлов амалга ошириши керак бўлади.
Қайд этилишича, утилизация тизими Франция, Германия, Буюк Британия, АҚШ, Япония ва бошқа қатор давлатларда кенг қўлланади.
