Канадалик 93 ёшли миллиардер жинсий зўравонлик бўйича айбдор деб топилди

Канада суди 93 ёшли миллиардер, Magna International компанияси асосчиси Френк Стронахни икки нафар аёлга нисбатан жинсий зўравонлик ва шилқимлик қилишда айбдор деб топди. Бу ҳақда CBC News хабар берди.

 

Жиноий иш Торонто шаҳридаги Онтарио олий судида кўриб чиқилди. Суд Френк Стронахни юқоридаги икки эпизод бўйича айбдор деб топди, бироқ унга қўйилган яна учта жинсий зўравонлик айблови бўйича оқлади. Тадбиркорнинг ўзи эса айбловларни рад этмоқда.

 

Суд материалларига кўра, жабрланувчилардан бири 1977 йилда Стронах унинг юбкасини кўтариб, зўрлашга уринганини маълум қилган. Судья аёлнинг кўрсатмаларини асосан ишончли деб топган, бироқ айрим тафсилотлар тўлиқ тасдиқланмагани сабабли ҳолатни одобсиз хатти-ҳаракат сифатида баҳолаган.

 

Яна бир аёлнинг билдиришича, 1980 йилларда Стронах унга нисбатан шилқимлик қилган. Аёлнинг сўзларига кўра, кечки овқатдан сўнг бизнесмен уни бир неча бор ушлаб қолишга уринган.

 

Учинчи даъвогар эса Стронахни зўрлашда айблаган, бироқ суд ушбу эпизод бўйича далилларни етарли деб топмади. Судья воқеалардан 40 йилдан ортиқ вақт ўтгани кўрсатмалар ишончлилигини баҳолашни мураккаблаштирганини қайд этди.

 

Forbes маълумотларига кўра, Френк Стронахнинг бойлиги 2018 йилда 1,5 миллиард долларга баҳоланган. Унга нисбатан якуний ҳукм 17 сентябрь куни эълон қилиниши кутилмоқда.

 

Канадада миллиардер 2024 йил июнь ойида жинсий жиноятлар бўйича айбловлар ортидан ҳибсга олинган, кейинчалик эса маълум шартлар асосида озод этилган.