Қримда аҳоли учун ёнилғи савдоси тўхтатилди
Ёнилғи эндиликда фақат ярим оролнинг фаолияти ва хавфсизлигини таъминлайдиган давлат идораларига сотилади.
Қримда аҳоли ва хусусий корхоналар учун ёқилғи савдоси вақтинча тўхтатилди. Бу ҳақда яриморол раҳбари Сергей Аксёновга таяниб, BBC хабар берди.
Аксёновнинг сўзларига кўра, ёнилғи эндиликда фақат Қримнинг фаолияти ва хавфсизлигини таъминлайдиган давлат идораларига сотилади. Мазкур қарор Украина томонидан Россия назоратидаги ҳудудлардаги логистика ва нефть инфратузилмасига уюштирилаётган ҳужумлар фонида қабул қилинган.
Аксёновнинг билдиришича, Керч шаҳридаги нефть базасига дронлар билан уюштирилган ҳужум оқибатида тўрт киши ҳалок бўлган, 28 киши жароҳат олган. Украина президенти Володимир Зеленский эса мазкур ҳужумни Россиянинг ҳарбий ҳаракатларига жавоб сифатида баҳолаган.
Зеленский Украина кучлари Россиянинг Краснодар ўлкасидаги нефть ташиш логистика объектларига, шунингдек ҳарбий логистика ва радар тизимларига ҳам зарбалар берганини маълум қилди. Россия Мудофаа вазирлиги эса бир кечада 239 та Украина дрони уриб туширилганини билдирган.
Қримда юзага келган ёнилғи тақчиллиги яриморолнинг логистика тизимига босим кучайганини кўрсатмоқда. Маҳаллий ҳокимият ёнилғи бозоридаги вазият бўйича қўшимча қарорлар кейинроқ эълон қилинишини маълум қилган.
Сўнгги ойларда Россия ва Украина ўртасидаги ҳужумлар кескинлашиб, томонлар бир-бирининг ҳарбий ва энергетика инфратузилмасини нишонга олишни давом эттирмоқда.
