ЖЧ—2026: Нидерландия Швецияни йирик ҳисобда мағлуб қилди
“F” гуруҳининг сўнгги турида нидерландлар Тунисга, шведлар эса Японияга қарши майдонга тушади.
АҚШнинг Ҳюстон шаҳридаги “NRG” стадионида бўлиб ўтган ЖЧ—2026 “Ф” гуруҳи 2-тур учрашувида Нидерландия Швецияни 5:1 ҳисобида мағлуб этди.
Нидерландлар сафида Браян Бробби дубль қайд этиб (5, 17), жамоасининг ғалабасига пойдевор қўйди. Иккинчи бўлимда Коди Гакпо ҳам икки бор рақиб дарвозасини ишғол қилди (47, 54). Швециянинг ягона голига Энтони Эланга муаллифлик қилди (59). Баҳсдаги сўнгги гол эса 89-дақиқада Кристофер Саммервил томонидан шведлар дарвозасига киритилди.
Шу тариқа, Нидерландия турнирдаги илк ғалабасини қўлга киритган бўлса, Швеция илк мағлубиятини қабул қилиб олди. Гуруҳнинг сўнгги турида нидерландлар Тунисга, шведлар эса Японияга қарши майдонга тушади.
