Эрон-АҚШ музокараларининг биринчи босқичи якунланди - нимага келишиб олинди?
Томонлар ўртасидаги техник музокаралар ҳафта охиригача давом этади.
Швейцариянинг Бюргенсток шаҳрида Қатар ва Покистон воситачилигида ўтказилган АҚШ ҳамда Эрон вакиллари ўртасидаги юқори даражадаги музокараларнинг биринчи босқичи якунланди.
Қатар Ташқи ишлар вазирлиги маълумотига кўра, томонлар 60 кун ичида якуний келишувга эришиш бўйича йўл харитасини ишлаб чиқишга келишиб олган. Шунингдек, воситачилик жараёнларини мувофиқлаштириш бўйича қўмита тузиш, Ливандаги ҳарбий ҳаракатларни тўхтатиш юзасидан Байрут иштирокидаги алоҳида гуруҳ ташкил этиш ҳамда Ҳормуз бўғози орқали тижорат кемаларининг хавфсиз ҳаракатини таъминлаш учун алоқа механизмини яратиш бўйича келишувларга эришилган.
Маълум қилинишича, барча масалалар юзасидан техник музокаралар ҳафта охиригача давом этади.
Эрон ташқи ишлар вазири Аббос Ароқчи Қатар ва Покистон воситачилигидаги саъй-ҳаракатлар натижасида Эрон нефти ва нефть-кимё маҳсулотлари экспортига қўйилган айрим чекловлар бекор қилингани, қатор активлар музлатилган ҳолатдан чиқарилгани ҳамда мамлакатни тиклаш ва ривожлантириш бўйича кенг қамровли дастур ишга туширилганини маълум қилган.
Аввалроқ АҚШ ва Эрон урушни тўхтатиш ҳамда Ҳормуз бўғози орқали кемалар ҳаракатини тиклашга қаратилган ўзаро англашув меморандумини электрон шаклда имзолагани ва ҳужжат кучга киргани хабар қилинган эди.
