Тошкентда автобус пиёдани уриб юборди
26 ёшли фуқаро светофорнинг тақиқловчи ишорасида пиёдалар йўлагидан югуриб ўтган.
Тошкент шаҳрида йўловчи автобуси иштирокида пиёда билан боғлиқ йўл-транспорт ҳодисаси содир бўлди. Бу ҳақда «Тошшаҳартрансхизмат» АЖ ахборот хизмати маълум қилди.
Қайд этилишича, ҳодиса 21 июнь куни соат 21:00 лар атрофида Яккасарой туманидаги Шота Руставели кўчасида юз берган. 38-сонли йўналишда ҳаракатланган “King Long” русумли автобус ҳайдовчиси Жанубий вокзал томонга кетаётган вақтда тартибга солинадиган пиёдалар ўтиш жойидан светофорнинг тақиқловчи қизил чироғида югуриб ўтган 26 ёшли A.A.ни уриб юборган.
Маълум қилинишича, автобус ҳайдовчиси зудлик билан транспорт воситасини тўхтатиб, жабрланувчини тез тиббий ёрдам машинасида 16-сонли шифохонага етказган. Ҳозирча унинг саломатлиги юзасидан маълумот берилмаган.
Ҳодиса Тошкент шаҳар ИИББ масъул ходимлари томонидан белгиланган тартибда расмийлаштирилиб, ҳолат юзасидан суриштирув ишлари олиб борилмоқда.
Эслатиб ўтамиз, аввалроқ пойтахтнинг Бектемир туманида «Yutong» электробуси орқага ҳаракатланаётганда 1991 йилда туғилган пиёдани босиб кетиши оқибатида у воқеа жойида ҳалок бўлганди.
