“Улар буни ҳис қилиши керак” — Зеленский Россияни янги зарбалар билан огоҳлантирди
Украина президенти дронлари 2000 километрдан ортиқ масофадаги нишонларга зарба бера олишини маълум қилди.
Украина президенти Владимир Зеленский Россиянинг кундалик ҳужумларига жавобан Россия ҳудудидаги нишонларга берилаётган зарбалар кучайтирилишини маълум қилди.
Давлат раҳбари журналист Алла Мазурга берган интервьюсида уруш оқибатлари Россия жамияти томонидан ҳам ҳис қилиниши кераклигини таъкидлаб, “Улар буни ҳис қилиши керак”, дея баёнот берган.
Зеленскийнинг сўзларига кўра, Украина мудофаа-саноат комплексининг ривожланиши ва узоқ масофали қуроллар ишлаб чиқариш ҳажмининг ошиши мамлакат имкониятларини сезиларли даражада кенгайтирган.
Президент Тюмен вилоятидаги нишонга берилган зарба ҳақида ҳам маълумот бериб, нишонгача бўлган масофа тахминан 2070 километрни ташкил этганини билдирган. Унинг қайд этишича, ҳужумда янги авлод “Fire Point” дронлари қўлланилган бўлиб, улар 2500 километрдан ортиқ масофани босиб ўтишга қодир.
Зеленский Украина Россиянинг ҳарбий заводлари, нефть базалари, газ омборлари ва бошқа стратегик объектлари жойлашуви ҳақида маълумотга эга эканини таъкидлаб, узоқ масофали қуролларни такомиллаштириш ишлари давом эттирилаётганини маълум қилган.
Унинг сўзларига кўра, бундай зарбалар Россия тажовузига жавоб ҳамда адолатни тиклашнинг бир қисми ҳисобланади.
