Ургутда 27,4 минг долларлик “гашиш” савдоси фош этилди
2 кг 80 грамм “гашиш”ни сотишга уринган уч нафар фуқаро ашёвий далиллар билан ушланган.
Давлат хавфсизлик хизмати ҳамда Ички ишлар органлари ходимлари ҳамкорлигида Самарқанд вилоятида ўтказилган тезкор тадбир давомида гиёҳвандлик воситалари савдоси билан шуғулланиб келган шахслар қўлга олинди. Бу ҳақда ДХХ Zamo.uz'гa хабар берди.
Аниқланишича, Ургут туманида яшовчи 1990, 1998 ва 2008 йилларда туғилган уч нафар фуқаро 2 килограмм 80 грамм «гашиш» моддасини шартли харидорга 27,4 минг АҚШ долларига сотаётган вақтида ашёвий далиллар билан ушланган.
Қайд этилишича, қўлга олинган шахслардан бири аввал ҳам гиёҳвандлик воситалари савдоси билан боғлиқ жиноят содир этгани учун судланган.
Мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Амалдаги қонунчиликка мувофиқ, бундай турдаги жиноятлар учун 20 йилгача озодликдан маҳрум қилиш жазоси назарда тутилган.
