“Ўзбекистон Португалиядан қўрқмайди” — Фабио Каннаваро

 

Ўзбекистон миллий терма жамоаси бош мураббийи Фабио Каннаваро Португалияга қарши бўладиган учрашув олдидан жамоанинг тайёргарлиги, Колумбияга қарши ўйиндан чиқарилган хулосалар ҳамда турнирдаги мақсадлари ҳақида фикр билдирди.

 

Италиялик мутахассис мураббийлик футболчиликдан тубдан фарқ қилишини таъкидлаб, майдон ташқарисида туриб футболчиларга ёрдам бериш истаги ва натижа учун жавобгарлик катта босим юклашини қайд этди.

 

Каннаваро Колумбияга қарши учрашувдан асосий хулоса сифатида юқори даражадаги баҳсларда кичик хатолар ҳам қимматга тушишини айтди. Унинг таъкидлашича, жамоа интизомли ва агрессив ўйин намойиш қилган бўлсада, айрим вазиятлардаги эътиборсизлик гол ўтказиб юборишга сабаб бўлган.

 

Шу билан бирга, мутахассис иккинчи бўлимдаги ўйиндан мамнун эканини билдириб, футболчиларга доимо ўз услубидан воз кечмаслик, тўп назоратидан қўрқмаслик ва футбол завқини ҳис қилиш кераклигини уқтириб келаётганини таъкидлади.

 

Португалия билан бўладиган учрашув ҳақида гапирар экан, Каннаваро рақиб таркиби юлдуз футболчиларга бой эканини, айниқса Криштиану Роналдунинг сўнгги йигирма йилнинг энг буюк футболчиларидан бири эканини қайд этди. Шунга қарамай, у майдонда номлар эмас, жамоавий ўйин ҳал қилувчи омил бўлишини айтди.

 

“Португалия жуда кучли жамоа. Бироқ ҳар бир жамоанинг кучли ва заиф томонлари бўлади. Биз уларнинг кучли жиҳатларини чеклаш ва заиф нуқталаридан фойдаланишга ҳаракат қиламиз”, — деди мураббий.

 

Фабио Каннаваро турнир якунида Ўзбекистон жамоаси жаҳон чемпионатида дебют қилган бўлсада, кучли рақиблардан чўчимайдиган, интизомли ва яхши ташкил этилган жамоа сифатида эсда қолишини исташини таъкидлади.

 

Шунингдек, италиялик мутахассис мураббийлик болаликдаги орзуси бўлмаганини, бироқ ҳозир ўз тажрибасини футболчилар билан баҳам кўриш ва ҳар куни янги нарсаларни ўрганиш унга катта завқ бағишлашини қайд этди.