“Биз қарамликдан халос бўлишимиз керак” — Нетаняху
Бош вазир Исроил ўзининг мустақил қурол ишлаб чиқариш тизимини яратиши кераклигини таъкидлади.
Исроил Бош вазири Бинямин Нетаняху мамлакат мудофаа саноатини мустақил ривожлантириш ва қурол-яроғ масаласида АҚШга қарамликни камайтириш зарурлигини маълум қилди деб хабар берди ТАСС.
Ғарбий Соҳилда курсантлар билан учрашув чоғида сўзга чиққан ҳукумат раҳбари америкалик ҳамкорларнинг кўмагини юқори баҳолашини таъкидларкан, Исроил ўзининг мустақил қурол ишлаб чиқариш тизимини шакллантириши лозимлигини қайд этган.
“Америкалик дўстларимизнинг қўллаб-қувватлашини чуқур қадрлайман, бироқ биз қарамликдан халос бўлишимиз ва ўзимизнинг мустақил қурол ишлаб чиқариш тизимимизни яратишимиз керак. Ўз қуролларимизни ишлаб чиқаришимиз зарур”, — деган Нетаняху.
Бош вазирнинг таъкидлашича, Исроил ҳозирда Эрон ва унинг минтақадаги иттифоқчилари билан қарама-қаршилик шароитида бўлиб, мамлакатнинг келажакдаги хавфсизлиги ва салоҳияти ўз кучига таяниш даражасига боғлиқ.
Нетаняху 3 май куни Исроил мудофаа саноатини ривожлантириш мақсадида кейинги ўн йил ичида мудофаа бюджетини 350 миллиард шекелга, яъни қарийб 115 миллиард долларга ошириш режалаштирилаётганини ҳам эслатиб ўтган.
