Россияда депутат болаларни 5-синфдан ҳарбий тайёргарликка жалб этишни таклиф этди
У мамлакат НАТО билан эҳтимолий қарама-қаршиликка ҳозирданоқ тайёрланиши кераклигини таъкидлаган.
Россия Давлат Думаси депутати Виктор Водолатский мамлакат 2030 йилда НАТО ва Европа Иттифоқи билан юзага келиши мумкин бўлган ҳарбий қарама-қаршиликка ҳозирданоқ тайёргарлик кўриши кераклигини билдириб, мактабларда бошланғич ҳарбий тайёргарликни кучайтиришни таклиф қилди.
«Абзатс» нашрига берган интервьюсида депутат ҳарбий-саноат мажмуасини ривожлантириш билан бир қаторда, ёш авлодни ҳам турли ташқи таҳдидларга тайёрлаш зарурлигини таъкидлаган. Унинг фикрича, кадет корпуслари тажрибаси асосида бешинчи синфдан бошлаб ўқувчиларга Ватан, оила ва миллий манфаатларни ҳимоя қилишга оид фанларни ўқитиш лозим.
Бироқ ушбу ташаббус Давлат Думаси қўмиталари томонидан қўллаб-қувватланмаган.
Хусусан, Оила ҳимояси, оталик, оналик ва болалик қўмитаси раиси Нина Останина таълим дастурида аллақачон “Ҳаёт фаолияти хавфсизлиги асослари” курси мавжудлигини эслатиб, унда биринчи тиббий ёрдам кўрсатиш, замонавий қуроллар ва хавфсизлик масалаларига оид билимлар берилишини қайд этган.
Унинг сўзларига кўра, болалар ўзларини ҳимоя қилишга тайёр бўлиши зарур, бироқ янги алоҳида фанни жорий этиш мақсадга мувофиқ эмас.
Давлат Думаси Таълим қўмитаси раисининг ўринбосари Михаил Берулава ҳам амалдаги дастурлар етарли эканини таъкидлаб, қўшимча ҳарбий тайёргарлик курсларини жорий этишга эҳтиёж йўқлигини билдирган.
