Биз учун мақом ҳамма нарса — Озодбек Назарбеков
Маданият вазири мақом санъати ўзбек халқининг маънавий мероси ва миллий ўзлигини намоён этувчи муҳим қадрият эканини таъкидлади.
Наманганда ўтказилаётган Халқаро мақом санъати анжумани доирасида ОАВ вакилларига интервью берган Маданият вазири мақом санъатини ўзбек халқининг маънавий ва маданий бойлиги сифатида таърифлади. Бу ҳақда Zamon.uz мухбири хабар бермоқда.
Озодбек Назарбековнинг таъкидлашича, мақом ўзида тарбия, маърифат, тарих ва инсоний қадриятларни мужассам этган бўлиб, миллатнинг дунёдаги ҳеч кимга ўхшамайдиган қирраларини намоён этади. У мақомни илмий асослари мустаҳкам, чуқур ўрганишни талаб қиладиган мукаммал санъат тури эканини қайд этди.
"Биз учун мақом ҳамма нарса. Биз ўзбек халқи учун мақом айнан ҳамма нарса. Бу айнан тарбия, бу маърифат, бу инсонийлик, бу эзгулик, бу яхшилик. Илм ҳамма нарса бор. Мақом ичида ҳамма нарса бор. Тарихимиз ҳам бор ва энг муҳими, миллатимизнинг шакли бор. Мақом мақомимизда айнан бизнинг ҳеч кимга ўхшамаган қиррамизни айнан мақомда кўрсатишимиз мумкин", деди вазир.
Шунингдек, вазир ёшлар орасида мақомга қизиқишни янада ошириш зарурлигини таъкидлаб, бу асраб-авайлаш ва келажак авлодга тўлиқ етказиш муҳимлигини билдирди.
