Францияда Эбола вируси билан касалланишнинг илк ҳолат қайд этилди

 

Францияда Эбола вирусини юқтириш билан боғлиқ биринчи ҳолат расман тасдиқланди. Бу ҳақда Le Monde нашри мамлакат Соғлиқни сақлаш вазирлиги маълумотларига таяниб хабар берди.

 

Қайд этилишича, вирус Конго Демократик Республикасида гуманитар миссияда фаолият юритган шифокорда аниқланган. У Францияга қайтган заҳоти, тест натижалари тасдиқланишидан аввал ҳам эҳтиёт чораси сифатида хавфли инфекцияларга ихтисослашган тиббиёт муассасасига жойлаштирилган. Ҳозирда беморнинг аҳволи барқарор деб баҳоланмоқда.

 

Франция соғлиқни сақлаш органлари томонидан эпидемиологик текширув бошланган. Бемор билан алоқада бўлган шахслар аниқланиб, уларга 21 кун давомида тиббий кузатув остида бўлиш ва ўзини изоляция қилиш тавсия этилган.

 

АFP агентлиги хабарига кўра, мамлакат Бош вазири Себастян Лекорну вазиятни шахсан назоратга олган. Франция расмийлари соғлиқни сақлаш тизими бундай хавфли инфекцияларга қарши самарали чоралар кўришга тайёр эканини таъкидламоқда.

 

Эбола вируси юқори ўлим кўрсаткичига эга бўлган геморрагик иситма касаллиги ҳисобланади. Ҳозирда Конго Демократик Республикасининг шарқий ҳудудлари, хусусан Итури вилояти эпидемиянинг асосий ўчоғи бўлиб қолмоқда. Расмий маълумотларга кўра, мамлакатда 900 дан ортиқ тасдиқланган ҳолат қайд этилган, 200 дан ортиқ бемор вафот этган. Касаллик Шимолий Киву ва Жанубий Киву вилоятларига, шунингдек, қўшни Угандага ҳам тарқалган.

 

Жаҳон соғлиқни сақлаш ташкилоти (ЖССТ) Эбола эпидемиясини халқаро миқёсда ташвиш уйғотувчи соғлиқни сақлаш соҳасидаги фавқулодда вазият сифатида баҳолаб, вазият устидан мониторингни кучайтирган.