Илон Маск триллионер мақомини йўқотди
Унинг соф бойлиги 957 миллиард долларгача камайган.
Америкалик миллиардер ва тадбиркор Илон Маск қисқа муддат сақлаб қолган триллионер мақомини йўқотди. Bloomberg Billionaires Index маълумотларига кўра, унинг соф бойлиги 957 миллиард долларгача камайган.
Маск жорий йилнинг 12 июнь куни тарихда триллион долларлик бойликка эга бўлган илк инсон сифатида қайд этилганди. Бироқ орадан 12 кун ўтиб, унинг активлари қиймати пасайиши фонида бойлиги яна 1 триллион доллардан пастга тушган.
Асосий омиллардан бири SpaceX акцияларининг кетма-кет тўрт савдо сессияси давомида арзонлашгани бўлди. 23 июнь куни компания акциялари 3,9 фоизга пасайиб, бир дона акция нархи 148,57 долларни ташкил этган. Натижада компаниянинг бозор капиталлашуви 1,99 триллион долларгача камайган. Бу рекорд даражадаги IPОдан буён SpaceX қиймати илк бор 2 триллион доллардан пастга тушганини англатади.
Июнь ойида ўтказилган IPО жараёнида компания 85 миллиард доллардан ортиқ маблағ жалб қилган эди. Ўшанда SpaceX'нинг бозор қиймати 2,9 триллион доллардан ошиб, қисқа муддат ичида Microsoft ва Аmаzоn каби гигант компанияларни ортда қолдирганди. Аммо кейинги ҳафталарда компания қиймати қарийб 550 миллиард долларга қисқарди.
Шу билан бирга, Forbes рейтингига кўра, Илон Маскнинг бойлиги ҳануз 1,1 триллион доллар атрофида баҳоланмоқда. Турли рейтинглар ўртасидаги тафовут активларни баҳолаш методологиясидаги фарқлар билан изоҳланмоқда.
