Қирғизистон парламенти президентлик сайловлари санасини тасдиқлади
Президент ташаббуси билан президентлик сайловларини ўтказиш тартиби ва муддатлари қайта белгиланди.
Қирғизистон Жогорку Кенеши мамлакат президенти ва парламент депутатлари сайловлари тўғрисидаги конституциявий қонунга киритилаётган ўзгартиришларни уч ўқишда маъқуллади. Мазкур ташаббус президент томонидан илгари сурилган бўлиб, кейинги президентлик сайловларини ўтказиш тартиби ва муддатларини аниқлаштиришни назарда тутади. Бу ҳақда inbusiness.kz хабар берди.
Қирғизистон Марказий сайлов комиссияси раиси Тинчтйк Шайназаровнинг маълум қилишича, ўзгартиришлар амалдаги қонунчиликни Конституция талабларига мослаштириш ҳамда сайлов санасини аниқ белгилашга қаратилган. Янги тартибга кўра, президентлик сайловлари январь ойининг тўртинчи якшанбасида ўтказилади ва овоз бериш санаси камида тўрт ой олдин эълон қилинади.
Шунга мувофиқ, Қирғизистонда навбатдаги президентлик сайловлари 2027 йил 24 январь куни ўтказилиши режалаштирилмоқда. Парламентдаги муҳокамалар давомида ҳафтанинг куни бўйича айрим техник ўзгартиришлар сабаб 27 январь санаси ҳам тилга олинди.
Жогорку Кенеш спикери Марлен Маматалиевнинг таъкидлашича, мазкур ўзгартиришлар сайловчиларнинг фаоллигини ошириш ва овоз бериш жараёнида юқори иштирокни таъминлашга хизмат қилади.
Қонун лойиҳаси эндиликда имзолаш учун Қирғизистон президентига юборилади ва расмий эълон қилингач кучга киради.
