Путин Украина билан музокараларга тайёрлигини маълум қилди
Кремль музокаралар учун илгари сурилган талаблар ўз кучида қолаётганини билдирган.
Россия Президенти Владимир Путин Украина билан тинчлик музокараларини давом эттиришга тайёр эканини маълум қилди. Бироқ у музокаралар аввал илгари сурилган шартлар ва эришилган келишувлар асосида олиб борилиши кераклигини таъкидлаган.
Путиннинг айтишича, Россия томони 2022 йил баҳорида Истанбулда бўлиб ўтган музокараларда шаклланган келишувларни музокаралар учун асос сифатида кўрмоқда. У ўша пайтда Украина делегацияси томонидан дастлабки ҳужжатлар маъқулланганини эслатиб, мазкур ёндашувдан воз кечиш учун сабаб кўрмаётганини билдирган.
Россия раҳбари, шунингдек, Доналд Трамп билан Анкорижда бўлиб ўтган учрашувда муҳокама қилинган масалалар ҳам келгусидаги мулоқотларда инобатга олиниши кераклигини қайд этган.
Маълум қилинишича, Москва илгари сураётган асосий шартлардан бири Украина қўшинларининг Донетск, Луганск, Запорижжя ва Херсон вилоятларидан чиқиб кетишини назарда тутади. Россия томони ушбу ҳудудларни музокаралар жараёнидаги муҳим масалалардан бири сифатида кўрмоқда.
Путин ҳукумат аъзолари билан учрашувда сўзлар экан, музокаралар жойлардаги амалдаги вазият ҳамда аввал эришилган келишувлар асосида давом этиши лозимлигини таъкидлаган.
Эслатиб ўтамиз, Россия ва Украина делегациялари ўртасидаги сўнгги музокаралар АҚШ воситачилигида Абу-Дабида бўлиб ўтган. Шунингдек, Туркия томони икки давлат ўртасидаги навбатдаги учрашувларга мезбонлик қилишга тайёр эканини билдирган.
