“Армия қуроллари Кремлга қаратилади”: Россиялик ҳарбий Путинга мурожаат йўллаб, таҳдид қилди
Кремль армиядаги қийноқлар ҳақидаги видеомурожаатни ўрганишини билдирди.
Кремль Украинадаги урушда қатнашган россиялик ҳарбий фахрий Александр Луниннинг Президент Владимир Путинга йўллаган видеомурожаатини ўрганишини маълум қилди. Бу ҳақда Reuters хабар берди.
Маълум қилинишича, видеода у Россия қўмондонларини аскарларни "ўлимга олиб келувчи буйруқларни" бажармагани ёки қўмондонларга пул беришдан бош тортгани учун қийноққа солиш ва ўлдиришда айблаган.
Кремль матбуот котиби Дмитрий Песковнинг айтишича, видеомурожаат ҳали кўриб чиқилмаган, бироқ унда "анча ғалати иборалар" мавжудлиги сабабли аввало унинг мазмуни ўрганилади.
Reuters хабарига кўра, Лунин видеомурожаатида минглаб россиялик ҳарбийлар буйруқларни бажаришдан ёки қўмондонларига пул беришдан бош тортгани учун махсус чуқурларда сақланаётганини, кейинчалик қийноққа солиниб ўлдирилаётганини, сўнг эса уларнинг "жанг вақтида бедарак йўқолгани" ҳақида ёлғон маълумот берилаётганини даъво қилган.
Бироқ видеода ушбу даъволарни тасдиқловчи далиллар, шунингдек, жабрланувчилар ёки айбланаётган шахсларнинг исмлари келтирилмаган. Reuters ҳам бу маълумотларни мустақил равишда тасдиқлай олмаганини қайд этган.
Воронеж вилоятида яшовчи Лунин видеони ҳарбий кийимда ва медаллари билан ёзиб олган. У, агар яқин вақт ичида Президент Путин билан жонли эфирда шахсан учрашмаса, "армия қуролларини Кремль томонга буриши" ҳақида таҳдид қилган.
Маълумотларга кўра, видеомурожаат Instagram тармоғида 24 соат ичида 12 миллиондан ортиқ марта томоша қилинган. Instagram Россияда тақиқланган бўлиб, ундан асосан VPN орқали фойдаланиш мумкин.
