Энди бошпана сўровчиларга АҚШ эшиклари ёпилади
Оқ уй бошпана сўровчиларни бошқа давлатларга йўналтиришни режалаштирмоқда.
АҚШ сиёсий бошпана сўраб мурожаат қилаётган хорижий фуқароларни қабул қилишни тўхтатишни режалаштирмоқда. Бу ҳақда Оқ уй аппарати раҳбари ўринбосари ва АҚШ президенти маслаҳатчиси Стивен Миллер маълум қилди дейди ТАСС.
Унинг сўзларига кўра, янги ёндашувга биноан АҚШ ҳудудига бошпана сўраб келган шахслар мамлакатга қабул қилинмайди. Бунинг ўрнига улар бошпана беришга тайёр бошқа давлатларга йўналтирилиши режалаштирилмоқда.
Стивен Миллер, шунингдек, АҚШ–Мексика чегарасида миграция назоратини янада кучайтириш зарурлигини таъкидлаб, жанубий чегарада берилаётган бошпана сўровларини танқид қилган.
Бундан ташқари, у АҚШда вақтинчалик ҳимояланган шахс мақомига эга бўлган Гаити фуқароларини имкон қадар тезроқ ўз ватанига қайтишга чақирган.
Мазкур баёнот АҚШ Олий суди маъмурият фойдасига қарор чиқарганидан сўнг янграган. Суд қарорига кўра, ҳукумат Сурия ва Гаити фуқароларига вақтинчалик ҳимояланган шахс мақомини беришни тўхтатиши мумкин.
