Венесуэлада зилзила ортидан вайроналар орасида чақалоқ туғилди
Туғруқ электр энергияси ва зарур тиббий жиҳозлар бўлмаган шароитда амалга оширилган.
Венесуэлада юз берган кучли зилзилалар оқибатида қулаб тушган бино вайроналари орасида қолган аёл кўнгиллилар ёрдами билан чақалоқни дунёга келтирди. Бу ҳақда El Mundo нашри хабар берди.
Маълум қилинишича, туғруқ электр энергияси ва зарур тиббий жиҳозлар бўлмаган шароитда амалга оширилган. Кўнгиллилар аёлга бирламчи ёрдам кўрсатиб, она ва чақалоқнинг ҳаётини сақлаб қолишга муваффақ бўлган.
Эслатиб ўтамиз, 24 июнь куни Венесуэлада қисқа вақт оралиғида магнитудаси 7,2 ва 7,5 бўлган иккита кучли зилзила содир бўлди. Шундан сўнг яна 30 га яқин такрорий ер силкинишлари қайд этилган.
Сўнгги расмий маълумотларга кўра, табиий офат оқибатида 235 киши ҳалок бўлган, 4300 нафардан ортиқ жабрланувчига тиббий ёрдам кўрсатилган. Ўнлаб турар жой бинолари вайрон бўлган, инфратузилма ва тиббиёт муассасалари жиддий зарар кўрган. Мамлакатда фавқулодда ҳолат эълон қилиниб, Ла Гуаира штати фалокат ҳудуди деб эълон қилинган.
Шунингдек, Россия Президенти Владимир Путин Венесуэла халқига ҳамдардлик билдириб, зарур ёрдам кўрсатишга тайёрлигини маълум қилган.
