Зеленский Россияга қарши 40 кунлик махсус операция эълон қилди
Операциянинг мазмуни ҳозирча ошкор этилмаган.
Украина президенти Владимир Зеленский Украина Хавфсизлик хизмати томонидан Россияга қарши амалга ошириладиган 40 кунлик махсус операцияни маъқуллаганини маълум қилди. Операция тафсилотлари ҳозирча ошкор этилмаган.
Зеленский бу ҳақда СБУ раҳбари Евгений Хмара билан ўтказилган учрашув якунлари юзасидан ўзининг Телеграм каналида маълум қилди.
Президентнинг билдиришича, учрашув давомида узоқ ва ўрта масофали зарба бериш режалари, шунингдек, СБУнинг «Альфа» махсус операциялар марказининг фронтдаги фаолияти юзасидан ҳисобот тингланган.
Зеленский СБУ томонидан турли турдаги дронлардан фойдаланиш Украина мудофаа кучларининг фронтдаги самарадорлигини сезиларли даражада оширганини қайд этган.
Шунингдек, у "урушни якунлаш мақсадида тажовузкор давлатга таъсир ўтказишга қаратилган 40 кунлик операцияни маъқуллаганини" билдирган. Бироқ операциянинг мазмуни, кўлами ва амалга ошириш механизмлари ҳақида қўшимча маълумот берилмаган.
Маълумки, СБУнинг «Альфа» махсус бўлинмаси терроризмга қарши кураш, махсус операциялар ҳамда Россия ҳудудидаги айрим стратегик объектларга уюштирилган дрон ҳужумларида иштирок этиши билан танилган.
Эслатиб ўтамиз, сўнгги ойлар давомида Украина Россиянинг энергетика инфратузилмасига зарбаларни кучайтирган. Хусусан, нефтни қайта ишлаш заводлари ва ёқилғи омборларига уюштирилган ҳужумлар ортидан Россиянинг айрим ҳудудларида ёқилғи тақчиллиги кузатилгани ва бензин савдосига вақтинчалик чекловлар жорий этилгани ҳақида хабарлар берилган.
