Трамп ўз сурати туширилган АҚШнинг янги эсдалик паспорти намунасини намойиш этди

АҚШ президенти Доналд Трамп мамлакат мустақиллигининг 250 йиллигига бағишлаб тайёрланган махсус эсдалик паспорти намунасини тақдим этди. Чекланган миқдорда чиқариладиган ҳужжатда президентнинг сурати акс эттирилган. Бу ҳақда CNN хабар берди.

 

Трамп паспорт макетини 26 июнь куни Truth Social ижтимоий тармоғидаги саҳифасида эълон қилди. 

 

У постида: “АҚШнинг янги паспорти. Унда 'Хуш келибсиз, аммо ўзингизни яхши тутинг!' деб ёзилган”, дея изоҳ қолдирди.

 

Президент тақдим этган намунада унинг Овал кабинетдаги Резолют столи ортида турган сурати тасвирланган. Сурат фонида Мустақиллик декларациясининг асл матни, пастки қисмида эса Трампнинг имзоси жой олган. Қарама-қарши саҳифада эса рассом Жон Трамбуллнинг “Мустақиллик декларацияси” асари тасвирланган.

 

CNN қайд этишича, паспортдаги Трамп сурати Вашингтондаги Смитсон миллий портрет галереясидаги расмий портрет асосида тайёрланганга ўхшайди. Мазкур дизайн Давлат департаменти 2026 йил бошида намойиш этган намунадан фарқ қилади.

 

26 июнь куни кечроқ Оқ уй ҳам Х ижтимоий тармоғидаги саҳифасида ушбу макетни эълон қилиб, уни “Американинг 250 йиллигига бағишланган янги АҚШ паспорти” деб таърифлади. 

 

Журналистлар эсдалик паспортининг якуний расмий варианти шу экани ҳақида сўраганида, Оқ уй изоҳ беришни Давлат департаментига йўналтирди. CNN ҳам бу масала юзасидан департаментга сўров юборган.

 

Мазкур чекланган миқдордаги паспорт илк бор апрель ойида АҚШ мустақиллигининг 250 йиллигига бағишланган лойиҳа доирасида эълон қилинган эди. 

 

Расмийларнинг маълум қилишича, ҳужжат тайёр бўлгач, Вашингтондаги паспорт агентлигига шахсан мурожаат қилиб паспортини янгилаган фуқароларга стандарт вариант сифатида берилади. Онлайн мурожаат қилганлар ёки бошқа ҳудудларда паспорт расмийлаштирганлар эса амалдаги эски дизайндаги паспортни олишда давом этади.

 

Ҳозирги АҚШ паспортининг ички муқовасида рассом Перси Моран ишлаган тасвир жойлаштирилган. Унда Френсис Скотт Кейнинг Форт-Макенри бомбардимонидан кейинги тонгни тасвирлаган расми акс этган бўлиб, айнан шу воқеа АҚШ мадҳиясининг яратилишига илҳом берган. Паспорт ичида мадҳиядан олинган сатрлар ҳам келтирилган.

 

Бундан аввал АҚШ Молия вазирлиги Трамп тасвири туширилган 250 долларлик янги банкнота чиқариш ғоясини ҳам илгари сургани ҳақида хабарлар тарқалган. 

 

Маълумотларга кўра, Трамп маъмуриятидаги айрим расмийлар янги номиналдаги банкнота ишлаб чиқилишини тезлаштириш учун АҚШ Ғазначилиги таркибидаги Босма ва ўйма бюросига босим ўтказган. 

 

Ташаббус муаллифлари сифатида ғазначи Брендон Бич ва унинг маслаҳатчиси Майк Браун тилга олинган. Улар тақдим этган намуналардан бирида 250 долларлик банкнот марказига Доналд Трамп сурати туширилган.