UFC: Нурсултон Рўзибоев рақибини илк раунддаёқ таслим этиб, UFC'даги 5-ғалабасини қўлга киритди
Ўзбекистонлик MMA жангчиси UFC Fight Night 280 турнирида россиялик Андрей Пуляевни илк раунддаёқ сабмишен усули билан мағлуб этди
Озарбайжон пойтахти Боку шаҳрида ўтказилган UFC Fight Night 280 турнирида ўзбекистонлик MMA жангчиси Нурсултон Рўзибоев навбатдаги жангини ўтказди. У ўрта вазн тоифасидаги баҳсда россиялик Андрей Пуляевга қарши октагонга чиқди.
Уч раундга мўлжалланган рейтинг жанги узоқ давом этмади. Рўзибоев илк раунднинг ўзидаёқ рақибини сабмишен (оғритувчи усул) орқали таслим этиб, муддатидан олдин ғалаба қозонди.
Мазкур натижа билан ўзбекистонлик спортчи профессионал ММА фаолиятидаги 37-ғалабасини қўлга киритди. Унинг ҳисобида, шунингдек, 9 та мағлубият ва 2 та дуранг мавжуд.
Бу Рўзибоевнинг УФCъдаги олтинчи жанги бўлди. Ушбу ғалабадан сўнг унинг промоушендаги статистикаси 5 ғалаба ва 1 мағлубиятни ташкил этмоқда.
28 ёшли Андрей Пуляев эса профессионал фаолиятидаги 5-мағлубиятини қабул қилиб олди. Унинг ҳисобида 10 та ғалаба бор.
Эслатиб ўтамиз, Нурсултон Рўзибоев аввал UFC 319 турнирида америкалик Браян Баттлга қарши жанг ўтказиши керак эди. Бироқ рақиб вазн меъёрини бажара олмагани сабабли ушбу баҳс сўнгги паллада бекор қилинганди.
Маълумот учун, UFC Fight Night 280 турнирининг марказий жанги Рафаэл Физиев ҳамда Мануэл Торрес ўртасида бўлиб ўтади.
