Францияда жазирама оқибатида ўлим кўрсаткичлари кескин ошди
Мамлакат соғлиқни сақлаш агентлиги 24 июндан буён одатдаги даврга нисбатан қарийб мингта кўпроқ ўлим қайд этилганини маълум қилди.
Францияда бир неча кундан буён давом этаётган рекорд даражадаги иссиқ оқибатида ўлим кўрсаткичлари кескин ошди. Бу ҳақда DW хабар берди.
Мамлакатнинг Santé publique France агентлиги маълумотига кўра, 24 июндан буён одатдаги даврга нисбатан қарийб 1 мингта кўпроқ ўлим қайд этилган. Идора бу маълумотлар ҳали якуний эмаслигини билдирган.
Маълум қилинишича, 24 июнь куни мамлакатда барча сабабларга кўра 1 200 нафардан ортиқ, 25 ва 26 июнь кунлари эса 1 400 нафардан ортиқ ўлим ҳолати қайд этилган. Таққослаш учун, апрель ва май ойларида Францияда кунига ўртача 900–1 000 киши вафот этган.
Соғлиқни сақлаш агентлиги ўлимлар сони айниқса «қизил» хавф даражаси эълон қилинган ҳудудларда кескин ошганини маълум қилди. Қайд этилишича, вафот этганларнинг 85 фоизини 65 ёш ва ундан катта фуқаролар ташкил этади. Шу билан бирга, ўлим кўрсаткичлари барча ёш гуруҳларида ошгани қайд этилган.
28 июнь куни мамлакатнинг аксарият ҳудудларида ҳаво ҳарорати пасая бошлади. Бироқ мутахассислар иссиқ тўлқинининг салбий оқибатлари ҳали бир неча кун давом этиши мумкинлигини таъкидламоқда.
Айни пайтда Германияда ҳам рекорд даражадаги иссиқ кузатилди. Германия метеорология хизмати маълумотига кўра, 27 июнь куни Саксония-Анҳалт федерал еридаги Древитс аҳоли пунктида ҳаво ҳарорати 41,5 даража Цельсийга етиб, мамлакат тарихидаги энг юқори кўрсаткич қайд этилди.
