Саудия Арабистонида вертолёт ҳалокатга учради, 14 киши ҳалок бўлди
Вертолёт нефть гиганти Aramco компаниясига тегишли бўлган. Компания тўрт ой давом этган танаффусдан сўнг хом нефть юклаш ишларини қайта тиклаган эди.
Саудия Арабистонининг давлат ахборот агентлиги хабарига кўра, мамлакатнинг нефть гиганти Aramco компаниясига тегишли вертолёт 28 июнь куни мамлакатнинг шарқий соҳилидаги Ras Tanura ҳудудида ҳалокатга учради, дея хабар бермоқда Reuters.
Маълум қилинишича, вертолёт маҳаллий вақт билан соат 06:00 атрофида қулаган. Ҳодиса оқибатида 14 нафар Саудия фуқароси ҳалок бўлган. Ҳалокат сабаблари ҳозирча номаълум.
Давлат ахборот агентлиги тегишли идоралар ҳодиса юзасидан тўлиқ тергов бошланганини маълум қилди. Aramco эса воқеа юзасидан юборилган сўровга ҳозирча жавоб бермаган.
Қайд этилишича, Aramco компанияси қарийб тўрт ой давом этган танаффусдан сўнг жума куни Форс кўрфазидаги Ras Tanura терминалида хом нефть юклаш ишларини қайта тиклаган эди.
Хабарга кўра, Саудия Арабистони дунёдаги энг йирик нефть экспортчиларидан бири ҳисобланади. Мамлакат Яқин Шарқдаги ишлаб чиқарувчилар қаторида АҚШ ва Эрон ўртасидаги урушни тўхтатишга қаратилган вақтинчалик келишув фонида нефть ва газ ишлаб чиқариш ҳамда экспорт ҳажмини оширган.
