Қирғизистон ва Қозоғистон бир-бирига 49 йилга ер участкалари беради

Қозоғистон Сенати Қирғизистон билан элчихоналар ва фавқулодда ҳамда мухтор элчилар қароргоҳларини жойлаштириш учун ер участкалари ва биноларни ўзаро ажратиш тўғрисидаги қонунни маъқуллади. Бу ҳақда Теngrinews.kz хабар берди.

 

Қонунга кўра, икки давлат ўз пойтахтларида элчихоналар ҳамда элчилар қароргоҳларини жойлаштириш учун бинолар ва ер участкаларини ўзаро бепул фойдаланишга беради. Ҳужжатнинг мақсади дипломатик ваколатхоналар фаолияти учун ўзаро манфаатдорлик ва тенг ҳуқуқлилик тамойиллари асосида қулай шароит яратишдан иборат. Томонларга кўчмас мулклар 49 йил муддатга берилади.

 

Қозоғистон Қирғизистонга Остонада элчихона қурилиши учун 0,74 гектар ер участкаси ва элчи қароргоҳи учун 1 267 квадрат метр майдонга эга алоҳида коттеж ажратади.

 

Қирғизистон эса Қозоғистонга Бишкекда элчихона жойлаштириш учун 0,75 гектар ер участкаси ҳамда элчи қароргоҳи учун 531 квадрат метр майдонга эга коттеж беради. Ҳар бир объект алоҳида ҳудуд билан таъминланади.

 

Сенат депутати Андрей Лукиннинг маълум қилишича, мазкур кўчмас мулклар ҳар икки давлатда барча турдаги солиқ ва йиғимлардан озод этилади. Биноларни қуриш, таъмирлаш, сақлаш ва коммунал хизматлар харажатлари эса мезбон давлатдаги амалдаги тарифлар асосида томонларнинг ўзи томонидан қопланади.

 

Маълумот учун, 2025 йил март ойида Қозоғистон Мажилиси АҚШ билан Остона шаҳрида дипломатик объект қурилиши учун 70,6 минг квадрат метр ер участкасини 49 йил муддатга ижарага бериш тўғрисидаги битимни ҳам маъқуллаган эди. 

 

Мазкур битимга кўра, АҚШ ер участкаси ижараси учун 25,3 миллион долларни битим кучга кирганидан кейин 30 кун ичида бир марталик тўлов сифатида амалга оширади.