Россияда "дўст бўлмаган" давлатлар фуқароларининг банк ҳисоблари музлатилмоқда
Россиянинг "дўст бўлмаган давлатлар" рўйхатига 49 та давлат, жумладан Европа Иттифоқига аъзо барча 27 мамлакат киритилган.
Россияда "дўст бўлмаган" давлатлар фуқаролари бўлган айрим хорижликлар банк ҳисоблари ва омонатлари блокланаётганидан шикоят қилмоқда. Бу ҳақда Т-Банк, Сбербанк ва ВТБ мижозларига таяниб, DW хабар берди.
Хабарга кўра, июнь ойидан бошлаб Россия президенти Владимир Путиннинг хорижий кредиторлар олдидаги мажбуриятларни тартибга солувчи фармони амал қилиш доираси кенгайтирилиб, хорижлик норезидентларнинг банк омонатларини ҳам қамраб олди. Шу муносабат билан айрим мижозларга ҳисоблари фармон талабларини бажариш мақсадида блоклангани ҳақида хабарномалар юборилган.
Ҳисоблари чекланганлар орасида "истеъдод визаси" эгалари, Россиянинг "анъанавий маънавий-ахлоқий қадриятлари"га содиқлигини билдирган хорижликлар ҳамда "дўст бўлмаган" давлатлардан Россияга кўчиб ўтиш учун ҳужжат расмийлаштираётган этник руслар ҳам бор.
Янги тартибга кўра, "дўст бўлмаган" давлатлар фуқароси бўлган норезидентларнинг ойига 10 миллион рублдан ортиқ депозит даромадлари махсус "С" туридаги ҳисобварақларга ўтказилади. Ушбу ҳисобварақлардаги маблағлардан фойдаланиш имконияти эса кескин чекланган.
Фармонда янги қоидалар барча турдаги омонатларга ёки фақат муддатли депозитларга татбиқ этилиши аниқ кўрсатилмагани сабабли банклар уни турлича талқин қилмоқда.
Россия Марказий банки зарурат туғилганда янги нормалар юзасидан расмий изоҳ беришини маълум қилган. Ҳисоблари чекланган мижозлар эса регулятор ёки суд орқали ушбу қарор устидан шикоят қилиши мумкин.
Маълумот ўрнида, Россия "дўст бўлмаган давлатлар" рўйхатини 2021 йилда тузган эди. Россиянинг Украинага бостириб кириши ва Москва қарши санкциялар жорий этилганидан сўнг ушбу рўйхат кенгайтирилди. Ҳозирда унга 49 та давлат, жумладан Европа Иттифоқига аъзо барча 27 мамлакат киритилган.
