Венесуэлада зилзила қурбонлари сони 1 450 нафарга етди
12 700 нафардан ортиқ фуқаро ўз уйини тарк этишга мажбур бўлган.
Венесуэлада содир бўлган кучли зилзилалар оқибатида ҳалок бўлганлар сони 1 450 нафарга етди. Қидирув-қутқарув ишлари давом этаётган бўлсада, минглаб одамларнинг тақдири ҳануз номаълумлигича қолмоқда. Бу ҳақда The Associated Press хабар берди.
Расмий маълумотларга кўра, табиий офат оқибатида 3 150 киши турли даражадаги тан жароҳатлари олган, 12 700 нафардан ортиқ фуқаро ўз уйини тарк этишга мажбур бўлган. Шунингдек, 774 та бино бутунлай қулаб тушган.
Энг катта талафот Каракас шаҳридан тахминан 40 километр шимолда жойлашган Ла Гуайра штатида қайд этилган. Мазкур ҳудудда қутқарувчилар вайроналар остида қолганларни излаш ишларини давом эттирмоқда.
Венесуэла ҳукумати қутқарув ва тиклаш ишлари узлуксиз давом этаётганини маълум қилган. Расмийларга кўра, сўнгги кунларда ҳам вайроналар остидан тирик фуқаролар қутқариб олинмоқда.
Табиий офат оқибатларини бартараф этиш ишларига халқаро ҳамжамият ҳам жалб этилган. Турли давлатлардан 2 600 нафардан ортиқ қутқарувчи ва махсус техникалар Венесуэлага етиб келиб, қидирув-қутқарув операцияларида иштирок этмоқда.
Мутахассисларнинг таъкидлашича, зилзиладан кейинги дастлабки 72 соат вайроналар остида қолганларни тирик ҳолда қутқариш учун энг муҳим давр ҳисобланади. Шу сабабли қидирув ишлари максимал тезликда давом эттирилмоқда.
