Ҳиндистондаги сув тошқинлари 22 мингдан ортиқ аҳолига зарар етказди
Тошқинлар 96 та қишлоқни сув остида қолдирди, минглаб аҳоли хавфсиз ҳудудларга эвакуация қилинмоқда.
Ҳиндистоннинг Ассам ва Аруначал-Прадеш штатларида кузатилган кучли ёғингарчилик оқибатида юзага келган сув тошқинлари 22 мингдан ортиқ аҳолига зарар етказди. Бу ҳақда Hindustan Times нашри хабар берди.
Маълум қилинишича, сув тошқинлари Ассамнинг олтита туманини қамраб олган бўлиб, энг кўп зарар Дҳемажи туманида қайд этилган. Мазкур ҳудудда 15 400 нафардан ортиқ аҳоли жабр кўрган.
Табиий офат оқибатида 96 та қишлоқ сув остида қолган, қарийб 1 690 гектар қишлоқ хўжалиги ерлари зарар кўрган. Шунингдек, 1965 йилда қурилган темир йўл кўпригининг бир қисми қулаб тушгани маълум қилинди.
Аруначал-Прадеш штатида эса кучли ёғингарчилик оқибатида уч киши ҳалок бўлган.
Расмийлар уй-жойидан айрилган аҳолини вақтинчалик бошпаналарга жойлаштирмоқда. Табиий офат 48 мингдан ортиқ чорва ва бошқа ҳайвонларга ҳам салбий таъсир кўрсатгани қайд этилган.
Синоптиклар 28 июндан 1 июлгача ҳудудларда кучли ёмғир ва момақалдироқ давом этишини прогноз қилмоқда. Шу боис янги сув тошқинлари ва кўчкилар юзага келиши хавфи сақланиб қолмоқда.
