Қирғизистонда Қамчибек Ташиев ва яна етти нафар айбланувчига 9 йил қамоқ сўралди
Прокуратура ҳокимиятни зўрлик билан эгаллашга тайёргарлик кўрганликда айбланаётган собиқ амалдорларга қатъий жазо талаб қилди.
Қирғизистонда давлат тўнтаришига уриниш иши бўйича прокуратура барча айбланувчиларни айбдор деб топиш ҳамда уларга 9 йилдан озодликдан маҳрум қилиш жазоси тайинланишини сўради. Бу ҳақда судланувчилардан бирининг адвокати Икрамидин Айтқулов маълум қилди.
Унинг сўзларига кўра, суд жараёнида томонларнинг якуний музокаралари бошланган ва давлат айбловчиси иш бўйича барча айбланувчиларга бир хил муддатдаги қамоқ жазосини талаб қилган.
Мазкур ишнинг асосий айбланувчиларидан бири Қирғизистон Миллий хавфсизлик давлат қўмитасининг собиқ раиси Қамчибек Ташиев бўлиб, у ҳокимиятни зўрлик билан эгаллашга тайёргарлик кўриш ҳамда мансаб ваколатини суиистеъмол қилишда айбланмоқда.
Иш доирасида яна етти нафар собиқ амалдор, жумладан, собиқ бош прокурор Курманкул Зулушев ва собиқ парламент спикери Нурланбек Турғунбек уулу ҳам судланмоқда.
Жиноят иши махфийлаштирилган бўлиб, суд мажлислари дастлаб ёпиқ тарзда ўтказилган. Кейинчалик адвокатлар талаби билан айрим тингловлар очиқ ўтказилган бўлсада, ҳозирда суд жараёни яна ёпиқ тартибда давом этмоқда.
Эслатиб ўтамиз, Қирғизистон президенти Садир Жапаров жорий йил февраль ойида Камчибек Ташиевни Миллий хавфсизлик давлат қўмитаси раиси лавозимидан озод қилган эди.
Шундан сўнг ҳукуматда кенг кўламли кадрлар алмашинуви амалга оширилди. Бир қатор вазирлар ҳамда юқори лавозимли мансабдорлар лавозимидан озод этилди. Мазкур воқеалар фонида янги президентлик сайловларини ўтказиш талаби билан мурожаат имзолаган айрим жамоатчилик фаоллари ва собиқ амалдорлар ҳам ҳуқуқни муҳофаза қилувчи органлар томонидан ҳибсга олинган.
