Қирғизистондаги мактаблар 12 йиллик таълим тизимига ўтди
Янги тартибга кўра, умумий таълим 6+3+3 модели асосида 12 йил давом этади.
Қирғизистон ҳукумати умумий ўрта таълим тизимини 12 йиллик моделга ўтказишни расман тасдиқлади. Шу муносабат билан умумий таълим ташкилотлари фаолиятини тартибга солувчи намунавий низомга тегишли ўзгартиришлар киритилди. Бу ҳақда Sputnik.kg хабар берди.
Янги тартибга кўра, умумий таълимнинг биринчи босқичи 6 йил, иккинчи босқичи 3 йил ва учинчи босқичи яна 3 йил давом этади. Шу тариқа, мактаб таълимининг умумий муддати 12 йилни ташкил этади.
Шунингдек, ўқув йилининг давомийлиги камида 34 ҳафта этиб белгиланди. Бунда 1-синф ўқувчилари учун ўқув йили 32 ҳафта, 2-синф ўқувчилари учун эса 33 ҳафта давом этади.
Янги низомга мувофиқ, мактаб таътилларининг умумий давомийлиги камида 30 кунни, ёзги таътил эса камида 14 ҳафтани ташкил этади.
Қайд этилишича, мазкур ислоҳот умумий таълим муассасаларида ўқув йилининг оптимал давомийлигини белгилаш ҳамда ўқув юкламасини оқилона тақсимлаш мақсадида амалга оширилмоқда.
Ҳукумат қарори расмий эълон қилинган кундан бошлаб 10 кун ўтиб кучга киради.
