Ҳозирча АҚШ билан янги музокараларни бошлаш режалаштирилмаган — Эрон
Теҳрон якуний келишув бўйича музокаралар меморандумдаги асосий мажбуриятлар бажарилгандан кейингина бошланишини билдирди.
Эрон яқин келажакда АҚШ билан ҳеч қандай даражада янги музокараларни бошлашни режалаштирмаётгани маълум қилинди. Бу ҳақда Эрон Ташқи ишлар вазирлиги расмий вакили Исмоил Бағайи маълум қилди дейди Тасним.
Унинг сўзларига кўра, Эрон экспертлар делегацияси эришилган келишувлар ижросини мониторинг қилиш мақсадида Қатар пойтахти Доҳага йўл олади.
Бағайи АҚШ меморандумнинг нефть савдосига оид 10-банди доирасида ўз зиммасидаги мажбуриятларни бажариш юзасидан зарур рухсатномаларни берганини, шунингдек, Эрон активларини блокдан чиқаришга оид 11-банд ижроси ҳам мониторинг босқичида эканини таъкидлаган.
"Эрон ҳали якуний келишув бўйича музокараларни бошлагани йўқ. Меморандумнинг 13-бандига мувофиқ, бундай музокаралар 1, 4, 5, 10 ва 11-бандларда назарда тутилган мажбуриятларнинг амалда бажарилишига боғлиқ", — деган ТИВ вакили.
Маълумот учун, меморандумнинг биринчи бандида барча фронтларда ҳарбий ҳаракатларни тўлиқ ва доимий тўхтатиш назарда тутилган. Шунингдек, ҳужжатда АҚШнинг Эрон нефти экспортига оид чекловларни юмшатиши, Эроннинг музлатилган активларини босқичма-босқич блокдан чиқариши ҳамда Форс ва Уммон кўрфазларида савдо кемалари қатновини тиклаш бўйича мажбуриятлар ҳам белгиланган.
