Қозоғистондa икки палатали парламент фаолияти якунланди

Қозоғистоннинг икки палатали парламенти 30 июнь куни ўз фаолиятини расман якунлади. Остона шаҳрида Сенат ва Мажлиснинг сўнгги қўшма мажлиси бўлиб ўтди. Унда президент Қосим-Жўмарт Тўқаев ҳам иштирок этди. Бу ҳақда 24.kg хабар берди.

 

Маълум қилинишича, Сенат ва Мажлис қарийб 30 йил давомида мамлакат тараққиётига оид муҳим қарорларни қабул қилиб келган. Шу даврда парламент 3,5 мингдан ортиқ қонунни маъқуллаган бўлса, уларнинг 300 дан ортиғи сўнгги уч йил ичида қабул қилинган.

 

Йиғилишда Қосим-Жўмарт Тўқаев VIII чақириқ парламент фаолияти якунларини сарҳисоб қилди ҳамда депутатларнинг мамлакатдаги сиёсий ва иқтисодий ислоҳотларни амалга оширишдаги ҳиссасини юқори баҳолади.

 

“Сиз мамлакат ҳаётидаги ўзгаришларнинг олдинги сафида бўлдингиз. Барча қийинчиликларга қарамай, кенг кўламли ислоҳотларни амалга ошириш учун тинимсиз меҳнат қилдингиз. Энг оғир дамларда масъулиятни ўз зиммангизга олдингиз ва мамлакатимиз учун зарур бўлган ислоҳотларнинг ҳаракатлантирувчи кучига айландингиз. Ҳар бирингиз ўз вазифангизни муносиб бажардингиз. Сиз Адолатли ва Кучли Қозоғистонни барпо этиш йўлида фидокорона хизмат қилдингиз”, — деди президент.

 

Президентнинг айтишича, парламент ўрнини эгаллайдиган янги Қурултой фаолияти замонавий бошқарув тамойиллари асосида йўлга қўйилади. Хусусан:

 

• қонун ижодкорлиги жараёни тезлаштирилади;
• бюрократик тартиб-таомиллар қисқартирилади;
• қонун лойиҳаларини ишлаб чиқишда таҳлилий ёндашув кучайтирилади;
• e-Parliament электрон парламент тизими жорий этилади;
• қонун лойиҳалари экспертлар ва жамоатчилик билан кенг муҳокама қилинади;
• қарорлар қабул қилишда прогнозли таҳлиллар, иқтисодий оқибатлар ва ижтимоий хавфлар инобатга олинади.

 

Тўқаев, шунингдек, мамлакат янги иқтисодий моделни шакллантиришни давом эттиришини, бунда саноат, транспорт, энергетика, рақамли технологиялар ва сунъий интеллектни ривожлантириш устувор йўналиш бўлиб қолишини таъкидлади.

 

Президент яқин кунларда Қурултой сайловларини ўтказиш тўғрисидаги фармонни имзолашини ҳам маълум қилди. Унинг сўзларига кўра, янги сиёсий тизим доирасида партиялар ўртасидаги рақобат кучаяди, сайловлар эса очиқ, ҳалол ва адолатли ўтиши керак.