Трамп бензин нархларини пасайтиришни талаб қилиб, сотувчиларга таҳдид қилди
АҚШ президенти нархларни сунъий ошириш ноқонуний эканини таъкидлаб, бунга амал қилинмаса, "катта муаммолар" юзага келишини айтди.
АҚШ президенти Доналд Трамп бензин чакана сотувчиларини ёқилғи нархларини зудлик билан пасайтиришга чақирди. Бу ҳақда у Truth Social ижтимоий тармоғидаги саҳифасида маълум қилди, дея хабар берди Reuters.
"Нархларни сунъий оширишга йўл қўйилмайди, бу мутлақо ноқонуний. Агар чакана сотувчилар буни қилмаса, олдинда катта муаммолар кутмоқда. Бир галлон бензин нархини тахминан 2,50 доллар даражасига туширишни мақсад қилинг", — деб ёзди Трамп.
Ўтган ҳафта АҚШ президенти Адлия вазирлигига нефть компаниялари хом нефть нархлари пасайганига қарамай, бензин нархларини туширмаётганини текширишни топширганини билдирган эди. Унинг фикрича, айрим компаниялар истеъмолчилардан сунъий равишда ортиқча ҳақ ундирмоқда.
Жорий йилда АҚШ ва Исроилнинг Эронга берган зарбалари ҳамда бунга жавобан Эроннинг Исроил ва АҚШ ҳарбий базалари жойлашган Форс кўрфази давлатларига уюштирган ҳужумлари фонида жаҳон нефть нархлари кескин ошган.
Сўнгги ҳафталарда эса Вашингтон ва Теҳрон ўртасидаги дипломатик мулоқотлар фонида АҚШда бензин нархларида маълум даражада пасайиш кузатилмоқда.
Бензин нархлари масаласи ноябрь ойида бўлиб ўтадиган оралиқ сайловлар арафасида АҚШдаги муҳим сиёсий ва иқтисодий мавзулардан бири бўлиб қолмоқда.
