Ўзбекистонда АИ-92 бензини нархи рекорд даражада қимматлади
Республика товар-хомашё биржасида АИ-92 маркали автомобиль бензини нархи бир тонна учун 13,919 млн сўмга етди.
Ўзбекистон республика товар-хомашё биржасида АИ-92 маркали автомобиль бензини нархи тарихий рекордни янгилади. Бу ҳақда Spot нашри биржа савдолари маълумотларига таяниб хабар берди.
29 июнь куни АИ-92 бензини бир тоннасининг нархи 13,919 млн сўмни ташкил этди. Бу аввалги савдо кунига нисбатан 1,1 фоизга юқори бўлиб, биржа тарихидаги энг юқори кўрсаткич сифатида қайд этилди.
Маълумотларга кўра, июнь ойи бошидан буён АИ-92 бензини нархи 1,473 млн сўмга ёки қарийб 11,8 фоизга ошган.
Нархларнинг энг кескин ўсиши ойнинг биринчи ярмида кузатилган. Хусусан, 4 июнь куни бир тонна бензин 12,476 млн сўмдан сотилган бўлса, 8 июнга келиб унинг нархи атиги тўрт кун ичида 10,5 фоизга ошиб, 13,788 млн сўмга етган. Кейинги икки ҳафта давомида нарх 13,7–13,8 млн сўм оралиғида шаклланиб турган, 29 июнь куни эса яна кўтарилиб, янги тарихий максимумни қайд этган.
Нархларнинг ўсиши фонида биржадаги ёқилғи таклифи ҳам қисқарган. Агар 1 июнь куни савдоларга 3 791 тонна АИ-92 бензини чиқарилган бўлса, 23 июнга келиб бу кўрсаткич деярли икки баробарга камайиб, 1 898 тоннани ташкил этган. 29 июнь ҳолатига таклиф ҳажми 3 123,2 тоннагача тикланган бўлса-да, бу нархларнинг пасайишига таъсир кўрсатмаган.
Spot қайд этишича, нархларнинг кескин ошиши Россияда ёқилғи танқислиги юзага келган даврга тўғри келган. Бунга Украина дронлари ҳужумларидан сўнг айрим нефтни қайта ишлаш заводларида режадан ташқари таъмирлаш ишлари олиб борилгани сабаб бўлган.
