Доҳада АҚШ ва Эрон ўртасидаги билвосита музокаралар ўтказилмоқда
Мулоқот воситачилар орқали олиб борилмоқда.
Қатар воситачилигида Доҳа шаҳрида АҚШ ва Эрон делегациялари ўртасида билвосита музокаралар бошланди. Бу ҳақда Al Arabiya телеканали манбаларга таяниб хабар берди.
Маълум қилинишича, АҚШ делегацияси музокаралар бошланиши арафасида Қатар вакиллари билан маслаҳатлашувлар ўтказган.
Реутерс агентлигининг Эрон ҳукуматидаги юқори мартабали манбага таяниб хабар беришича, сешанба оқшомидан буён Доҳа шаҳрида Вашингтон ва Теҳрон ўртасида воситачилар орқали мулоқот давом этмоқда. Эрон делегацияси Қатар ва Покистон вакиллари билан учрашувлар ўтказган бўлиб, улар орқали АҚШ томонига тегишли маълумотлар етказилган.
Манбага кўра, чоршанба куни давом этган музокараларнинг асосий мавзулари Эроннинг музлатилган хориждаги активлари ҳамда Ҳормуз бўғози билан боғлиқ масалалар бўлган.
Аввалроқ АҚШ президенти Доналд Трамп Эрон Америка томони билан учрашув ўтказишни сўраганини маълум қилган эди. АҚШ делегацияси таркибида президентнинг махсус вакили Стив Уиткофф ҳамда Жаред Кушнер иштирок этаётгани билдирилмоқда.
Шу билан бирга, Қатар Ташқи ишлар вазирлиги вакили Мажид бин Муҳаммад ал-Ансарий Доҳада АҚШ ва Эрон делегациялари ўртасида тўғридан тўғри музокаралар режалаштирилмаганини, мулоқот воситачилар орқали олиб борилаётганини таъкидлаган.
