Самарқандда 42 ёшли эркак дарёга чўкиб кетди
Ҳозирда қутқарувчилар томонидан қидирув ишлари олиб борилмоқда.
Самарқанд вилоятининг Оқдарё туманида 42 ёшли фуқаро Қорадарё дарёсига тушиб кетгани оқибатида бедарак йўқолган. Бу ҳақда вилоят Фавқулодда вазиятлар бошқармаси матбуот хизмати маълум қилди.
Қайд этилишича, ҳодиса 28 июнь куни Оқдарё туманининг «Истиқлол» маҳалла фуқаролар йиғини ҳудудидан оқиб ўтувчи Қорадарё дарёсида содир бўлган. Дастлабки маълумотларга кўра, 42 ёшли фуқаро Ж.О. эҳтиётсизлик оқибатида дарёга тушиб кетган.
Ҳодиса юзасидан Фавқулодда вазиятлар бошқармасига хабар келиб тушгач, қутқарувчилар воқеа жойига жалб этилган. Ҳозирда дарё ҳудудида фуқарони топиш бўйича қидирув-қутқарув ишлари узлуксиз давом эттирилмоқда.
Эслатиб ўтамиз, аввалроқ Тошкент вилоятининг Бўстонлиқ туманида ҳам икки нафар бола каналга тушиб кетиши оқибатида ҳалок бўлгани ҳақида хабар берилганди.
