Венесуэладаги зилзиладан олти кун ўтиб, 3 ёшли бола вайроналар остидан тирик қутқарилди
Болани Иорданиядан келган қутқарувчилар вайроналар остидан олиб чиққан, ҳозирда 3 ёшли Клибер Моран шифохонада даволанмоқда.
Венесуэлада ўтган ҳафта юз берган вайронкор икки зилзиладан кейин олиб борилган қидирув-қутқарув ишлари давомида эрта тонгда бир бола вайроналар остидан тирик олиб чиқилди. Бу ҳақда Reuters агентлиги хабар берди.
Президент вазифасини бажарувчи Делси Родригеснинг Теlegram'да маълум қилишича, Клибер Моран исмли бола Ла Гуайра штатидаги Los Коrales Garden 1 турар жой мажмуаси вайроналари остида олти кун қолганидан сўнг Иорданиядан келган қутқарувчилар томонидан қутқарилган.
Расмий маълумотларга кўра, Венесуэлада ўтган чоршанба куни бир дақиқадан кам вақт оралиғида магнитудаси 7,2 ва 7,5 бўлган иккита зилзила содир бўлган. Табиий офат оқибатида кўплаб бинолар қулаб, минглаб одамлар вайроналар остида қолган.
Делси Родригес болани 3 ёшли деб атаган бўлса, Миллий ассамблея президенти Хорхе Родригес унинг 2 ёшда эканини билдирган. Бола қутқарилгач, тиббий муассасага олиб борилган.
“Вайроналар остидан яна тирик одамларни топиш умидини йўқотмаслигимиз керак. Бугун эрта тонгда 2 ёшли бола қутқарилди ва ҳозир Каракасдаги тиббиёт марказида даволанмоқда”, — деди Хорxе Родригес телевидение орқали қилган мурожаатида.
Шунингдек, БМТ матбуот котиби Стефан Дюжаррикнинг маълум қилишича, сешанба куни UNICEF томонидан юборилган 47 тонна гуманитар ёрдам Венесуэлага етиб келган.
Юк таркибига шошилинч тиббий ёрдам тўпламлари, хавфсиз туғруқ, янги туғилган чақалоқлар парвариши, касалликларнинг олдини олиш ва даволаш учун зарур воситалар киритилган.
