Қамчибек Ташиев 4 йилга қамалди

2 июль куни Қирғизистоннинг Биринчи май туман суди "75 мактуб" иши бўйича ҳукм чиқарди. Бу ҳақда Akipress хабар берди.

 

Маълум қилинишича, суд барча судланувчиларни мансаб ваколатини суиистеъмол қилиш моддаси бўйича айбсиз деб топди. Шу билан бирга, ҳокимиятни зўравонлик йўли билан эгаллаш айблови бўйича Қамчибек Ташиев, Курманкул Зулушев, Нурланбек Тургунбек уулу, Курсан Асанов, Аалй Карашев, Эмилбек Узакбаев, Бекболот Талгарбеков ва Курманбек Дийканбаев мол-мулки мусодара қилинган ҳолда 4 йил муддатга озодликдан маҳрум этилди.

 

Бироқ суд уларга нисбатан пробация қўллади. Натижада барча маҳкумларга 3 йил муддатга пробация назорати белгиланди. Бундан ташқари, ҳибсда сақланаётган беш нафар судланувчи суд залидан озод қилинди. Уларга нисбатан  қамоқ эҳтиёт чораси мамлакат ҳудудини тарк этмаслик тўғрисидаги тилхат билан алмаштирилди.

 

Мазкур иш сиёсатчилар ва жамоат арбоблари гуруҳи томонидан муддатидан олдин президентлик сайловларини ўтказишга чақирилган мурожаат — "75 мактуб" билан боғлиқ. Мурожаат эълон қилинганидан сўнг Қирғизистонда қатор кадрлар алмашинуви юз берган. Жумладан, Қамчибек Ташиев Вазирлар Маҳкамаси раиси ўринбосари ва Миллий хавфсизлик давлат қўмитаси раиси лавозимидан озод этилган.

 

Иш бўйича собиқ Миллий хавфсизлик давлат қўмитаси раҳбари Қамчибек Ташиев, депутат Курманкул Зулушев, Жогорку Кенеш спикери Нурланбек Тургунбек уулу, шунингдек, Бекболот Талгарбеков, Эмилбек Узакбаев, Аалй Карашев, Курманбек Дийканбаев ва Курсан Асанов судланувчи сифатида жалб этилган.

 

Улар ҳокимиятни зўравонлик йўли билан эгаллашга тайёргарлик кўришда айбланган. Қамчибек Ташиевга нисбатан, шунингдек, мансаб ваколатини суиистеъмол қилиш айблови ҳам илгари сурилган.

 

Аввалроқ давлат айбловчиси иш бўйича барча айбланувчиларни 9 йил муддатга озодликдан маҳрум этишни сўраган эди. Судланувчилар эса сўнгги сўзида суддан оқлов ҳукми чиқаришни сўраган.