Европадаги жазирамадан сўнг Франция жанубида ўрмон ёнғинлари авж олди

Европадаги кучли жазирамадан сўнг Франциянинг Ўрта ер денгизи бўйидаги ҳудудларида бир нечта йирик ўрмон ёнғинлари юз берди. Ёнғинларни ўчиришга 2 минг нафар ўт ўчирувчи жалб этилган. Бу ҳақда Reuters хабар берди.

 

Испания чегараси яқинидаги Канет-ан-Руссиён шаҳрида омборхоналар ва маринадаги яхта ёниб кетган. Қалин тутун соҳил бўйлаб тарқалган. Маҳаллий ҳокимият маълумотига кўра, шаҳардаги кемпинглардан 1,5 минг киши эвакуация қилинган, Перпинян аэропорти эса вақтинча ёпилган.

 

Куннинг аввалида ўт ўчирувчилар Франциянинг иккинчи йирик шаҳри Марсел чеккасидаги икки ёнғинни назорат остига олди. Бироқ Ауде департаментидаги йирик ёнғинни ўчириш ишлари давом этмоқда.

 

Франция бош вазири Себастен Лекорну Марселда фавқулодда йиғилиш ўтказди. Мамлакат метеорология хизмати эса келаси ҳафтада яна бир экстремал иссиқ тўлқини кузатилиши мумкинлигидан огоҳлантирди.

 

Бош вазирнинг маълум қилишича, жорий мавсум бошидан буён Францияда 8,7 минг гектар майдон ёниб кетган. Шундан 1,2 минг гектари фақат чоршанба кунги ёнғинлар оқибатида зарарланган.

 

Жаҳон метеорология ташкилоти аввалроқ июнь ойи охирида Ғарбий Европада кузатилган рекорд даражадаги жазирама узоқ давом этадиган иссиқ об-ҳаво, паст намлик ва қуруқ ўсимлик қоплами сабаб ўрмон ёнғинлари хавфини янада ошириши ҳақида огоҳлантирган эди.

 

Канет-ан-Руссиёндаги ёнғинни ўчириш учун тўртта вертолёт жалб этилган, учта Canadair ёнғин ўчириш самолёти эса шай ҳолатда сақланмоқда.

 

Ауде департаментида ёнғин қарийб 900 гектар майдонни қамраб олган. Соатига 70 километр тезликда эсаётган шамол қарийб 700 нафар ўт ўчирувчининг ишини қийинлаштирмоқда.

 

Франция соғлиқни сақлаш идоралари ҳисоб-китобига кўра, аввалги жазирама тўлқини мамлакатда камида минг нафар қўшимча ўлим ҳолатига сабаб бўлган бўлиши мумкин.