Самарқандда жазо муддатини қисқартириш эвазига 15 минг доллар олган адвокат ушланди
Шунингдек, 2 минг доллари эвазига судланувчига енгилроқ жазо тайинлатишни ваъда қилган адвокат ҳам қўлга олинди.
Давлат хавфсизлик хизмати Жиззах вилояти бошқармаси ҳамда вилоят прокуратураси ходимлари ҳамкорлигида ўтказилган тезкор тадбирлар давомида Самарқанд вилоятида фаолият юритувчи икки адвокатнинг ноқонуний фаолиятига чек қўйилди. Бу ҳақда ДХХ хабар берди.
Аниқланишича, Ургут туманида фаолият юритувчи адвокат мансабдор танишлари орқали Жиззах вилоятидаги манзил колониясида жазо ўтаётган маҳкумнинг озодликдан маҳрум этиш муддатини қисқартириб беришни ваъда қилган. Бунинг эвазига у маҳкумнинг танишидан 15 минг АҚШ доллари олган вақтида ашёвий далиллар билан қўлга олинган.
Яна бир ҳолатда эса Қўшработ туманида фаолият юритувчи адвокат жиноят ишлари бўйича туман судида кўрилаётган ишда ҳимоячи сифатида иштирок этиб, мансабдор танишлари орқали судланувчига енгилроқ жазо тайинланишига ёрдам беришини билдирган. Ушбу хизмат эвазига судланувчининг ўғлидан 2 минг АҚШ доллари талаб қилган.
ДХХ ва прокуратура органлари ходимлари томонидан ўтказилган тезкор тадбирда адвокат талаб қилинган пул маблағини олаётган вақтида ашёвий далиллар билан ушланди.
Мазкур ҳолатлар юзасидан адвокатларга нисбатан тегишли моддалар билан жиноят ишлари қўзғатилиб, дастлабки тергов ҳаракатлари олиб борилмоқда.
