Венесуэладаги зилзила қурбонлари сони 2 300 нафарга яқинлашди
Ҳукумат зилзила қурбонлари хотирасига 7 кунлик миллий мотам эълон қилди.
Венесуэлада кучли зилзилалар оқибатида ҳалок бўлганлар сони 2 295 нафарга етди. Бу ҳақда мамлакат Миллий Ассамблеяси раиси Хорхе Родригес маълум қилди.
Сўнгги расмий маълумотларга кўра, табиий офат оқибатида яна 11 мингдан ортиқ киши жароҳатланган, 12 800 нафар фуқаро эса вақтинчалик бошпаналарга жойлаштирилган.
Қайд этилишича, 24 июнь куни Венесуэлада кетма-кет 7,2 ва 7,5 магнитудали иккита кучли зилзила содир бўлган. Шундан буён 782 та афтершок қайд этилган бўлиб, уларнинг интенсивлиги аста-секин пасайиб бормоқда.
Энг катта талафот Ла Гуаира шаҳрида кузатилган. Дастлабки маълумотларга кўра, ҳудудда камида 100 та бино тўлиқ вайрон бўлган. Шунингдек, Каракас, Миранда, Арагуа, Карабобо, Лара ва Яракуй штатларида ҳам жиддий зарар қайд этилган.
Миллий Ассамблея раисининг таъкидлашича, қидирув-қутқарув ишлари узлуксиз давом этмоқда. Бироқ вайроналар остидан тирик қолганларни топиш эҳтимоли тобора камайиб бормоқда.
Табиий офат қурбонлари хотирасига Венесуэла ҳукумати 1 июлдан бошлаб етти кунлик миллий мотам эълон қилди.
