“Эрон АҚШнинг деярли барча талабларига рози бўлди” — Трамп
АҚШ президенти Эрон билан музокараларда муҳим силжиш кузатилаётганини билдириб, якуний келишувга яқин қолинганини айтди.
АҚШ президенти Доналд Трамп Эрон билан давом этаётган музокараларда сезиларли натижаларга эришилганини билдириб, Теҳрон Вашингтон илгари сурган деярли барча шартларга рози бўлганини маълум қилди.
СNBC телеканалига берган интервьюсида Трамп ҳозирда томонлар ўртасида музокаралар давом этаётганини қайд этиб, якуний натижа яқин кунларда маълум бўлиши мумкинлигини таъкидлади.
“Биз музокаралар олиб боряпмиз. Менимча, улар бизга керак бўлган деярли барча нарсага рози бўлишди”, — деган АҚШ президенти.
Шунингдек, Трамп АҚШ Эрон билан узоқ давом этадиган ҳарбий можарога киришни истамаслигини билдириб, қисқа муддат ичида ҳарбий мақсадларга эришилганини таъкидлаган.
Унинг сўзларига кўра, АҚШ Эроннинг ҳарбий салоҳиятига жиддий зарба берган ва зарурат туғилганда қолган имкониятларини ҳам йўқ қилишга қодир.
Эслатиб ўтамиз, июнь ойида АҚШ ва Эрон ўртасидаги қарама-қаршилик кескинлашганидан сўнг Қатар воситачилигида билвосита музокаралар бошланган эди. Сулҳ эълон қилинганига қарамай, томонлар бир-бирини келишувни бузишда айблаган, бироқ кейинчалик музокараларни давом эттиришга келишиб олган.
