Венесуэладаги зилзила қурбонлари сони 2595 кишига етди
Зилзиладан буён вайроналар остидан 6462 киши тирик қутқарилган.
Венесуэлада 24 июнь куни содир бўлган кучли зилзилалар оқибатида ҳалок бўлганлар сони 2595 нафарга етди. Бу ҳақда мамлакатнинг вақтинчалик президенти Делси Родригес маълум қилди.
Каракасдаги Ла Карлота авиабазасида ўтказилган матбуот анжуманида таъкидланишича, 7,2 ва 7,5 магнитудали икки кучли зилзила оқибатида 12 400 киши турли даражада жароҳат олган. Қидирув-қутқарув ишларига 33 давлатдан келган мутахассислар жалб этилган.
Родригеснинг билдиришича, табиий офат содир бўлганидан буён вайроналар остидан 6462 киши тирик ҳолда қутқариб олинган.
Унинг сўзларига кўра, зилзиладан сўнг мамлакатдаги барча фавқулодда хизматлар зудлик билан сафарбар этилган, фуқаролик мудофааси тизими ҳамда давлатнинг фавқулодда вазиятларга жавоб бериш механизмлари дарҳол ишга туширилган.
Шунингдек, Делси Родригес ҳукумат офатга кеч жавоб бергани ҳақидаги даъволарни рад этиб, асосий мақсад инсонлар ҳаётини сақлаб қолиш эканини таъкидлади. У қидирув-қутқарув ишларида сиёсий омиллар эмас, инсонпарварлик тамойиллари устувор бўлаётганини қайд этган.
Расмий маълумотларга кўра, зилзилалар оқибатида уй-жойини тарк этишга мажбур бўлганлар сони 12 841 нафарга етган. Ҳукумат йил якунига қадар бошпанасиз қолган барча фуқароларни янги уй-жой билан таъминлашни режалаштирмоқда.
