Европадаги жазирама қурбонлари сони 3 700 нафарга етди

 

Июнь ойида Ғарбий Европани қамраб олган аномал иссиқ тўлқини оқибатида Франция, Бельгия ва Нидерландияда камида 3 700 та ортиқча ўлим қайд этилди. Бу ҳақда Reuters агентлиги ушбу давлатлар соғлиқни сақлаш идоралари маълумотларига таяниб хабар берди.

 

Маълумотларга кўра, энг кўп ўлим ҳолати Францияда кузатилган. Мамлакатда 22–28 июнь кунлари жазирама туфайли 2 025 киши вафот этган. Бельгияда 18–29 июнь кунлари 1 200 га яқин, Нидерландияда эса 480 га яқин ортиқча ўлим қайд этилган.

 

Қурбонларнинг асосий қисмини ёши катта фуқаролар ташкил этгани айтилмоқда. Франция Соғлиқни сақлаш вазирлиги маълумотига кўра, жазирама даврида мамлакатда умумий ўлим кўрсаткичи қарийб 30 фоизга ошган.

 

Иссиқлик тўлқини Ғарбий Европанинг бошқа давлатларига ҳам жиддий таъсир кўрсатди. Хусусан, Германиянинг айрим ҳудудларида сув танқислиги сабаб фавқулодда ҳолат эълон қилинган. Маҳаллий ҳокимиятлар сув ресурсларини тежаш мақсадида фавворалар фаолиятини чеклаш, автомобилларни ювиш ва бассейнларни тўлдиришдан вақтинча воз кечишни тавсия қилмоқда.

 

Эслатиб ўтамиз, июнь ойининг охирида Ғарбий Европада кузатилган аномал иссиқ даврида Франциянинг Паллуо коммунасида ҳаво ҳарорати 43,8 даражагача кўтарилиб, тарихий рекорд қайд этилган.