Тошкентда йўловчи багажидан 7 кгдан ортиқ синтетик гиёҳвандлик воситаси топилди
Мазкур модда қуруқ сут қадоқларига яширилган бўлиб, қўшни давлат фуқароси юкни 1000 АҚШ доллари эвазига етказиб беришга рози бўлган.
Пхукетдан учиб келган 19 ёшли қўшни давлат фуқаросининг багажидан мефедрон синтетик гиёҳвандлик воситаси топилди. Бу ҳақда Божхона қўмитаси раисининг матбуот котиби Ҳусан Тангриев хабар берди.
Маълум қилинишича, йўловчининг багажи божхона кўригидан ўтказилганда, юклар орасидаги қадоқланган қуруқ сут маҳсулотлари божхона ходимларида шубҳа уйғотади.
Марказий божхона лабораториясида ўтказилган экспертиза натижасида 10 та қадоқ ичидаги модда қуруқ сут эмас, балки умумий оғирлиги 7 килограмм 180 грамм бўлган мефедрон синтетик гиёҳвандлик воситаси экани аниқланди.
Дастлабки маълумотларга кўра, йўловчи ушбу наркотикларни “Теlegram” мессенжери орқали танишган номаълум шахснинг кўрсатмаси билан 1000 АҚШ доллари эвазига Тошкент шаҳрига етказиб бериш учун олиб келган.
Ҳолат юзасидан тегишли тартибда суриштирув ва тергов ҳаракатлари олиб борилмоқда.
Қайд этилишича, наркотикларни уюшган гуруҳ томонидан трансмиллий усулда ёки Интернет тармоғи орқали ўтказиш учун жавобгарлик белгиланган ва бу 15 йилдан 20 йилгача озодликдан маҳрум қилиш билан жазоланади.
